შოთა ქავთარაძე – დღეს არაფერი არ შეიცვლება
January 14, 2014 § Leave a comment
დღეს არაფერი არ შეიცვლება,
რადგან შენ ჩემი მეუღლე გქვია…
მაგრამ მე ვფიქრობ-
ხომ შეიძლება,
მენახე, მაგრამ ძალიან გვიან.
ხომ შეიძლება, გეცხოვრა სადღაც,
შევხვედროდით და ჩაგვევლო უბრად,
შეეწყობოდი სრულიად სხვა კაცს,
დაუმშვენებდი ოჯახს და სუფრას.
ეს გაზაფხული შენით მიცვნია,
გზადაგზა მინდვრის ყვავილებს ვითვლი…
და ახლა ფიქრიც არ შემიძლია,
რომ შენ შეგეძლო ცხოვრება სხვისთვის.